Projekt - Singende Klassen

Cianté ie n training de energia che sustën la cunzentrazion y l svilup dla persunalitá. Cun l prioiet “Tlasses che cianta, - scoles che cianta” uel la federazion di cores dl Südtirol n cunlaurazion cun la ntendenza tudëscia y la scoles de mujiga dé n sustëni cuncret al cianté tla scoles elementeres dla pruvinzia.

Cianté debrieda a d’autri ie bel, judá l’inclujion, sustën na bona articulazion, possa valorisé la usc de uni un, portà emozions y dantaldut gran legrëza! Coche la paroles dla prima ciantia dijova avisa, l cianté adum pò mëter su un puent danter duc i ciantarins (“Ein Lied kann Brücken bauen!”)

La maestres de trëi tlasses dla scola elementera de Urtijëi se à scrit ite l prim iede a chësc proiet. L fova udù dant de cianté ntan l ann de scola uni di per 10 menuc te tlas y de mparé ite la cianties metudes a disposizion dala federazion di cores per pudëi tò pert ala gran ancunteda finela. Chësta gran festa de cianté cun autra scoles dl Südtirol ie unida a se l de per nosta scola ai 23.4. tla Cësa de Cultura Forum a Persenon.

Na curiera plëina de 52 mutans y mutons, duc furnì a ghiel sciche n grum de surëdli, fova piei ora dala valeda cun na curiera do na gran preparazion fata a puntin dala maestres. Na gran band de musizisć nes aspitova bel y la sala se mpleniva for de plu de sculeies, unì adalerch da Sterzing a Funes, da Trens a Urtijëi y dai luesc ntëur a Persenon. Bel la prima ciantia suneda y cianteda debrieda lasciova audì la gran grinta di 440 ciantarins.

Danter cianties per duc pudova uni grupa presenté mo na si ciantia favoriseda. La maestres ova per chësta ucajion mpará ite la ciantia “Nëus jon pa bel plan” cun la paroles y melodia de Siegfried Demetz da Fëur. Acumpaniei dal’armonica, à nosc sculeies purtà dant chësta ciantia cun ardimënt, giapan ala fin propi n gran aplaus. Ce marueia udëi duc chi uedli lucënc, la gran boces y l corp n muvimënt cun l ritm dla mujiga!

La ie stata na bela gran festa, nia de competizion, ma per la legrëza de cianté! N auter ann sarons de segur inò leprò.

Ulon motivé ënghe autra scoles elementeres ladines a tò pert a chësta esperienza positiva de cianté regularmënter te tlas y te scola. L gran cunzert finel a livel de plu valedes ie stat n’ucajion per pudëi viver n liam cun sculeies de autra scoles tres la mujiga.

Heidi Stuffer

per la tlasses 3.B, MA y M4

dla Scola Elementera de Urtijëi